காசி மாணிக்கம், திருத்தணி, திருவள்ளூர் மாவட்டம்
‘மோசடி செய்தவர்கள் உலகில் எங்கும் ஓடி ஒளிய முடியாதபடி நடவடிக்கை எடுக்க வேண்டும் என்கிறாரே ‘ பிரதமர் மோடி?
உலகில் எங்கு ஒளிந்தாலும் நடவடிக்கை எடுத்துவிடலாம் தான். பாஜகவிற்குள் ஓடி ஒளிந்து கொள்கின்றனரே!
ப.சரஸ்வதி, சுங்குவார்சத்திரம், காஞ்சிபுரம்
‘கரோனா மூன்றாவது அலை ஜனவரி,பிப்ரவரியில் தொடங்க வாய்ப்பிருப்பதாக’ சுகாதாரத்துறையினர் சொல்கிறார்களே?
சுகாதாரத்துறை ஜோசியத்துறையாகிவிட்டதா?
இதை திட்டமிட்டு பரப்புகிறார்களா..? அல்லது பரப்புபவர்களின் குரலாக ஒலிக்கிறார்களா?
செந்தில், ஜாபகர்கான்பேட்டை, சென்னை
எடப்பாடி உள்ளிட்ட அதிமுக முன்னாள் மாஜிக்கள் ஆளுநரை சந்தித்துள்ளார்களே..?
ஆளுநர் மாளிகை அபயம் தேடுபவர்களின் அடைக்கலமா? ரெய்டுகள் என்பது கைதுகளுக்கு நகருமா? தடைபடுமா? பார்ப்போம், பொறுத்திருந்து!
அப்துல்காதர், வாலாஜாபேட்டை, வேலூர் மாவட்டம்
ரஜினியின் ‘அண்ணாத்தே’ பாடல்கள் போதுமான கவனம் பெறவில்லையே..? ஏன்..?
உண்மைதான்! விஜய், அஜித், தனுஷ், சூர்யா படப்பாடல்கள் ஒரு கோடிக்கு மேற்ப்பட்ட பார்வையாளர்களை ஈர்க்கின்றன! அதில் பாதியைத் தான் அண்ணாத்தே தொட்டுள்ளது!
அண்ணாத்தே, அண்ணாத்தே பாடல் மட்டும் எஸ்.பி.பியின் கடைசி பாடல் என்ற வகையில் கவனம் பெற்றது! சாரல் காற்றேவும், மருதாணியும் ..ம்கூம்!
அம்மா வயதுள்ள நடிகைகள், தாத்தா வயதுள்ள நடிகர்..! என்ன செய்வது? ஓடிக் களைத்த கப்பல் கரை ஒதுங்குவது இயற்கை தானே!
டேவிட், நாகர்கோவில்,குமரிமாவட்டம்
இந்தியாவிலேயே அதிக கொரோனா தடுப்பூசி போட்டுக் கொண்ட கேரளாவில் தினசரி கொரோனா பாதிப்பு பத்தாயிரத்திற்கு குறையாமல் உள்ளதே?
அதிலும், கேரளாவில் கொரானா தடுப்பூசி போட்டவர்களைத் தான் அதிகம் தாக்குகிறது. கொரானாவில் இறந்தவர்களில் 57 சதவிகிதத்தினர் தடுப்பூசி போட்டுக் கொண்டவர்களே! யார் கண்டது? தடுப்பூசிக்கு தடை கோரும் போராட்டம் கேரளாவில் வெடிக்கவும் வாய்ப்புள்ளது!
ராஜமாணிக்கம், பந்தல்குடி, விருதுநகர் மாவட்டம்
‘சினிமா துறையில் கட்டபஞ்சாயத்து செய்பவர்கள் மீது நடவடிக்கை எடுக்க வேண்டும்’ என டி.ராஜேந்தர் –உஷா தம்பதி புகார் கூறுகின்றனரே!
அவங்க மட்டுமே செஞ்சத, மத்தவங்களும் செய்வதா..? அதிரப் பேசி, அவமானபடுத்திவிட்டால், எதிர்தரப்பினர் அஞ்சி நடுங்கி வழிக்கு வருவார்கள் என்பது அதில் ஒரு யுத்த தந்திரம்! அதைத்தான் அந்த குடும்பத்தினர் தொடர்ந்து செய்கிறார்கள்!
எஸ்.கவின், மணலூர்பேட்டை, கள்ளக்குறிச்சி
உள்ளாட்சி தேர்தலில் பணம் பெருங்காற்றியிருக்கும் நிலையில், நேர்மையான நிர்வாகத்தைப்பெற நீங்கள் மக்களுக்கு சொல்லும் யோசனை என்ன…?
யோசனையெல்லாம் யாருக்கு தேவை? நேர்மையான நிர்வாகத்தை பற்றி கவலைப்படாத மக்களால் தான் பணம் விளையாடி இருக்கிறது! அனுபவித்து பாடம் பெறட்டும்.
மருதமுத்து, கரூர்
சர்வாதிகாரி ஹிட்லர், கொடுங்கோலன் இடிஅமின் போன்றவர்கள் ஆட்சி பற்றி கேள்விப்பட்டு இருக்கிறேன். இப்போது அது போன்று இந்தியாவில் நடப்பதாக தோன்றுகிறது. இந்த உணர்வு சரிதானா?
ஹிட்லரின் நாஜி கட்சி வருங்காலத்தில் பேரழிவை நிகழ்த்த அதற்கான சூழலை உருவாக்க அன்று என்னென்ன செய்ததோ அவை அனைத்தையும் இன்று பாஜக செய்து வருகின்றது! பாஸிசத்தை நோக்கிய நகர்வு என்பதே சரியாக இருக்கும்.
சிபி, பேரளையூர், கடலூர்
‘தமிழ் இந்து என்பது இந்துத்துவத்திற்கு மாற்று’ என பெ. மணியரசன் கூறுவது சரியா?
பெ.மணியரசனின் தமிழ்த் தேசிய பேரியக்கம் தன்னை தமிழ்த் தேசிய பாஜகவாக மாற்றிக் கொண்டதாகப் புரிந்து கொள்கிறேன்.
ப. சிங்காரம் நாவல்கள் குறித்துக் கூறுங்கள்.
புலம்பெயர் இலக்கியத்தின் முன்னோடி ப.சிங்காரம். ‘புயலிலே ஒரு தோணி’, ‘கடலுக்கு அப்பால்’ ஆகிய இரு நாவல்களை மட்டுமே எழுதி நீங்காப் புகழ் பெற்றவர். மன்னிக்கவும், நான் இது வரை வாசித்ததில்லை.
தயாளன், தாம்பரம், செங்கல்பட்டு
நாம் தமிழர் பாஜகவின் B டீம் என்பது பற்றி உங்கள் கருத்து என்ன ?
ஒத்துக் கொள்ளமாட்டேன். நாம் தமிழர் தான் உண்மையான – ஒரளவு பலமான – தமிழக பாஜக!
இராமநாதன், தல்லாகுளம் , மதுரை
வைகோவின் மகன் துரைவையாபுரி மதிமுகவின் தலைமைக்கு அடையாளப் படுத்தப்பட்டுள்ளது பற்றி..?
‘கொள்கைக் குன்றாக’ மதிமுகவை நினைத்திருந்த தொண்டர்களுக்கு ‘இல்லை இது குடும்ப சொத்து’ என உணர்த்தியுள்ளார் வைகோ! மகனைக் கொண்டு மதிமுகவிற்கு முடிவுரை எழுதுகிறார்!
மு.ராஜலிங்கம், சிதம்பரம்
பஞ்சாபில் அமீந்தர்சிங் புதுக் கட்சி ஆரம்பித்து பாஜகவுடன் கூட்டு சேர்கிறாராமே..?
80 வயதில் தன் எதிர்கால அரசியலுக்காக, காலமெல்லாம் எதிர்த்தவர்களோடு கைகோர்கிறார்!
அடங்காத அதிகாரப் பசி, அவமானங்களையே பெற்றுத் தரும்!
குறிப்பு;
https://forms.gle/g3i6Bd5S4DD9FGWD8
கேள்வி கேட்க விரும்புபவர்கள் இந்த லின்கில் சொடுக்கி கேள்வியை பதிவு செய்யலாம்.
